S'See-Buebelied

Ju-he! Die luschtige Buebe sind do,
die Buebe vom Züri-See.
Gang's Ländeli uf, gang's Ländeli ab,
so Kärli findsch niene, persée!
Händ immer en g'sunde und frohe Muet,
au wänn's grad Chatze hagle tuet.
Halli hallo d'Seebuebe sind do, jä so!

Chum sind mir hinder de Ohre troche,
so tüemer scho jasse und chegle.
Und fische und fahre und schwümme im See,
drum seit me eus Züriseehegle.
Es Schätzeli hät scho en jede Chnopf,
susch isch es en trurige Zwetschge-Chopf.
Halli hallo d'Seebuebe sind do, jä so!

Am Samstig z'Abig do gömmer z'Liecht,
bald obsi, bald nidsi am See.
Doch erscht wenn d'Sternli schyne tüend,
denn g'hört is und g'seht is kei Mänsch meh.
Doch mängisch do chunt me nüd bis zum Chind,
sie haued eim vorher es Loch in Grind.
Halli hallo d'Seebuebe sind do, jä so!

Und chunnt dänn d'Suser und d'Chilbi Zyt,
so simmer ganz usem Hüsli.
Mir haueds in Jeue, in Hirsche, is Chrüz
go tanze mit eusene G'spüsli.
S'wird g'sunge und g'johlet und musiziert,
bis d'Schuggerei alli a d'Luft spediert.
Halli hallo d'Seebuebe sind do, jä so!

Und wenn's is entli uf's Totebett leit,
so brucht is au niemer z'tröschte.
Mir fahred mit Freude id Ewigkeit,
vom Chlinschte a bis zum Gröschte.
De Petrus rüeft: Grüss Gott, bim Eid!
Uf dich han i gwartet du liebe Cheib!
Halli hallo d'Seebuebe sind do, jä so!